पुणे : संरक्षण मंत्रालय भारत सरकार व दलित इंडियन चेंबर ऑफ कॉमर्स अँड इंडस्ट्रीच्या (डिक्की) संयुक्त विद्यमाने अनुसूचित जाती व जमातीच्या उद्योजकांसाठी पुण्यात आठ फेब्रुवारी रोजी ‘उद्योजकता विकास आणि बायर-सेलर मीट’ या कार्यक्रमाचे आयोजन करण्यात आले आहे.
या कार्यक्रमाचे उद्घाटन संरक्षण मंत्रालयाचे सचिव अजयकुमार यांच्या हस्ते सकाळी ११ वाजता होणार आहे. या वेळी पुणे जिल्हाधिकारी नवलकिशोर राम, डिक्कीचे संस्थापक अध्यक्ष पद्मश्री मिलिंद कांबळे, डिक्कीचे पश्चिम भारत अध्यक्ष निश्चय शेळके आणि डिक्की महाराष्ट्राचे अध्यक्ष अविनाश जगताप, डिक्कीचे अवजड उद्योग विभागाचे प्रमुख अनिल होवाळे उपस्थित असणार आहेत.
भारत सरकारच्या अंगीकृत उपक्रमांमार्फत सेवा व वस्तूंची जी खरेदी केली जाते, त्याच्या चार टक्के खरेदी ही अनुसूचित जाती व जमातीच्या उद्योजकांकडून करणे अनिवार्य आहे आणि संरक्षण मंत्रालयाच्या उपक्रमांनीही ती करणे अपेक्षित आहे.
या संबंधीची जाणीव जागृती निर्माण करण्यासाठी कार्यक्रमाचे आयोजन करण्यात आले आहे.
या कार्यक्रमात अनुसूचित जाती व जमातीच्या इंजिनीअरिंग, फॅब्रिकेशन, सुटे भाग बनवणारे, प्रिसिजन व सेवा पुरवणारे अशा क्षेत्रात काम करणाऱ्या उद्योजकांसाठी संधी आहे. कार्यक्रमासाठी सात फेब्रुवारीपर्यंत आगाऊ नोंदणी करणे आवश्यक असून, सदस्य होणेही आवश्यक आहे. तसेच हा कार्यक्रम सशुल्क असून, दलित इंडियन चेंबर ऑफ कॉमर्स अँड इंडस्ट्रीच्या (डिक्की) कार्यालयात सकाळी दहा ते सहा या वेळेत नाव नोंदणी करणे आवश्यक आहे.
या कार्यक्रमात भारत इलेक्ट्रॉनिक्स लिमिटेड, माझगाव डॉक, महाराष्ट्रातील ॲम्युनिशन फॅक्टरीज, गोवा शिपयार्ड, हिंदुस्थान एअरोनॉटिक्स लिमिटेड (नाशिक) सहभागी होतील. अशी माहिती डिक्कीतर्फे पत्रकाद्वारे देण्यात आली आहे.